مديرتكوا جايه علشان تعذبكوا فى مدرسه ريهام فقط على منتديات مصر الحره

الاسم / محمد عبدالباسط عزالدين
السن / 25 عام
الدراسه / بكالوريوس تجاره
بلد الاقامه / مصر - وحاليا السعوديه
الصف اللى نفسى ارجعله / مراحل الاعداديه

اه طبعا ( مصطفى ومحمد على واحمد فوده والدسوقى وضياء دول اللى ما زلت صاحب ليهم ) وفيه بقا اللى راحوا
ومعرفش عنهم حاجه ( محمد كمال ومحمد عزت الله يرحمه وكتير والله فاكر اشكالهم ووشوهم بس اسماءهم نسيتها فعلا )

بصراحه اه حصلت مشكله مع صاحبى ضياء فى امتحان كان قصادى وعايز يغش منى وانا ولا معبره هههههههه وبعدين بالقلم اللى بيكتب بيه بدأ
ينغذنى فى جمبى الله يحرقه ههههههه اشتكيته زعل منى وبعد الامتحان دقينا خناقه لرب السماء كسرنا الديسكات على بعض وحوالى اربعين خمسين
واحد من زملائنا مش قادرين يحشونا عن بعض وتانى يوم الصبح اتصالحنا ورجعت علاقتنا اكتر من الاول بس بعد ما شرحنا بعض هههههه

موقف حلو انى كنت مشهور جدا عند كل المدرسين والمدرسات لدرجه انهم كانوا بيخلونى اشرح واكتب بدالهم على السبوره
موقف وحش هما اتنين الاول كان فيه ترشيح لانتخاب رئيس الفصل وكان قصادى محمد على صاحبى وكانت الرئاسه دايما معايا
وخسرتها فى الصف الثالث الاعدادى بفرق صوت واحد بس وزعلت اوى على الرغم انه كان بيستمد كل حاجه منى
والثانى لا مؤاخذه يعنى كان عليا كنس وتنظيف الفصل فى الصف الثانى الاعدادى ورفضت الكنس واول حصه كانت عربى للاستاذ عبدالمعطى شعبان
وكان صاحب بابا ولما دخل طلب منى انى انظف الفصل والطلبه كلهم قاعدين فى اماكنهم ورفضت وضربنى اربع عصيان على ايدى الشمال بس
ونزلنى عن المدير علشان يفصلنى بعد ما عاندته واستفزيته جدا ومكنتش بخاف الحمد لله واستنيته عند باب المدير ولما نزل قالى اطلع فصلك واتصل بـ بابا
وحكاله وبابا هزئنى شويه وتانى يوم صالحنى وقالى تحضر الدرس مع زمايلك قلتله حاضر وعدى الموقف

اه عشت وحصل مواقف كتير ولكنها اسرار

لالالا كنت بذاكر لواحدى لما والدى كان يذاكرلى تبقى الليله غم ونكد ويضربنى هههههههه افتكر انه كان عايزنى احفظ الكتاب برقم الصفحات
يعنى بيسمعلى الكتاب لو سألنى يقولى رقم الصفحه كام والسطر الكام اقوله ايه ياعم هو ده فى الامتحان يقولى لا عايزك تأكل الكتاب
زى ما بتقعد على السفره تلغ فى الاكل بالمناسبه يعنى ايه تلغ دى ههههههههه

هو الانجليزى بس وباقى المواد كنت باخدها غصب عنى كل المدرسين اصحاب والدى وكانوا ياخدونى دروسهم بالعافيه والله جايز علشان طالب متفوق
وبيجاملوا والدى ولا ايه مش عارف

كتييييييييييييييييييييييير مقدرش اعدهم ده السور بتاع مدرسه الثانويه اشتكى منى انا واصحابى والمواسير داحنا كنا مسجلين خطر تزويغ
فيه بقا موقف حصل كنت مزوغ انا ومصطفى صاحبى ونزلنا من على المواسير لان المدير وكان اسمه عبدالستار نجم عمل على السور
اسلاك شايكه وعلاه اوى نزل مصطفى الاول وانا وراه لقينا مين تحت واقفلنا السعيد عمر كان اللى بعد المدير على طول مش فاكر منصبه اسمه ايه
ياااااااالهوى رعبنا ومسكنا زى الحراميه وقالنا روحوا استنونى قدام البوابه وكان رايح يفطر وطبعا قلت لمصطفى يلا بينا نمشى اصل هنتفصل
قالى يمكن يسامحنا قلتله لا هيفصلنا وهينسى اصلا يلا قالى يلا وكده كده بايظه هنتفصل هنتفصل وروحنا لعبنا بلاى استيشن ولا عندنا دم ههههههههه

لا الحمد لله كنت بركز فى الحصص كلها وخاصه الالعاب والرسم والتربيه الفنيه والحصص التافهه دى ههههههههه
ولو حصه مش عجبانى بستاذن اروح الحمام ومبرجعش الا لما تخلص والجرس يضرب ههههههه دمااااااااااغ يعنى

ابتدائى ( مريله وشنطه وبصراحه مبعرفش الالوان )
اعدادى ( قميص وبنطلون مش فاكر لون حاجه فيهم كحلى والثانى والله مش فاكر )
ثانوى ( اى لبس وعيش يامعلم )

هو موقف الاستاذ عبدالمعطى فى الرد السابق
والثانى كان مدير مدرسه الثانويه المفترى عبدالستار نجم علشان كنا مزوغين اخد الغياب الواعى فى اخر حصه
وعرف كل اللى زوغوا وتانى يوم فى الطابور ظبتهم صح يعنى وكنت منهم

لالالالا الحمد لله عمرى ما فكرت اغش من حد حتى لو مش عارف السؤال بجاوب من دماغى ولا يمكن اثق فى اجابه اى حد وكنت بغششهم كلهم من
ابتدائى لحد اخر الكليه كمان

اكتر حاجه بكرهها لحد دلوقتى انى اصحى بدرى ياسلاااااااااام شويه النوم بتوع الصبح دول ملهومش حل والله والدتى كانت تغلب فيا
تصحينى ومش بصحى وتنادى والدى طبعا وكان يدخل ومعاه قزازه مياه ساقعه ثلج من الثلاجه الله وانا متغطى بقا ومدفى كده
وتلاقينى باخد شاور ثلج يالهوووووى ايام ياريهام والله يارب ما يعودها

المذاكره بالليل كنت اسهر كتير وانام الصبح كتير يمكن لحد الفجر وانام للظهر ولا يمكن اعرف اذاكر الا وفيه صوت جمبى كنت اشغل الكمبيوتر واعيش
ممكن انسى نفس وانا بذاكر للصبح وكانوا الجماعه يستغربوا بتركز ازاى ومحدش بيعرف يذاكر فى الصوت والدوشه الا انا وبصوت عالى كمان

مواد الحفظ بصوت عالى وافضل رايح جاى فى الاوضه انما الرياضيات اللى بعشقها كتابيه وانا قاعد وحل مسائل والمحاسبه والمواد اللى بتحتاج كتابه دى
وكنت جميع المواد بلخصها كلها فى ورق خارجى وارمى الكتاب بعد ما اخلص تلخيص واعتمد على تلخصى ده

هيا تناسب البنات اكتر علشان حنيتهم وبيقدروا يتعاملوا مع الاولاد وهيخلوا الاولاد يحبوا المدرسه ولو عندى طفل تكون مدرسه طبعا
المدرسات شطار بيذاكروا كتير وبيهتموا بكل حاجه انما المدرسين بيهتموا اكتر بالدروس والفلوس والمصاريف وكده يعنى

مش بالبركه ولا كتب لان التربيه مش محتاجه كتب ولا حاجه اكيد زى ما اتربيت هربى ابنى ومامته كمان هتربيه بنفس تربيتها مع زيادات ممكن تكون مطلوبه
الزيادات دى مش نقص فى تربيتنا ولكن تتماشى مع الواقع وتغيير الزمن والوقت وطبعا تربيه الاسلام هتكون فى المقام الاول

الضرب مش مطلوب غير فى اوقات معينه اخطاؤ الاطفال ممكن نقول اخطاء نسامح فيها واخطاء يكفى فيها العتاب واللوم واخطاء تستدعى حرمانه من بعض الاشياء اللى
بيحبها ومتعلق بيها واخطاء نحرمه من المصروف والفسح والخروجات واخطاء تستدعى الضرب

والله انا اتفصلت مره واحده فى الثانويه بس غيابى الكتير كان والدى عارف بيه علشان المذاكره فى البيت وعدم تضيع الوقت واليوم كله فى الدراسه والذهاب والاياب
وكانت الدراسه لا تستدعى الحضور وجه معايا المدرسه علشان اعيد قيدى ضربنى حته قلم قدام مدير المدرسه عمرى ما انساه وزعلت منه بصراحه ولما رجعت البيت
صالحنى وقالى لازم اعمل كده قدامه وكلام من ده بس لو ابنى اتفصل علشان الهروب لو صغير اكيد له تصرف وعقاب انما لو كبير هقعد معاه افهم منه بصراحه
هروبه ليه مبيحبش المدرسه ولا ايه السبب فى هروبه منها ايه اللى معقده ولو مفيش حاجه فيه طرق كتير اوصله ان التعليم والكليه مطلوبه والنجاح والتفوق
له فرحه كبيره واكلمه عن مستقبله ولو اصلا هروبه ده حصل هيكون خطأ من التربيه من البدايه لازم نعودهم ونعلمهم حب التدريس والنجاح

النصائح كتير لحب المذاكره والتعليم وهحاول اقارن بين شخصين فى الواقع احدهما ناجح ومشهور والاخر فاشل ومفتقد احترام الناس
هحاول اوصله ان النجاح بيجعله محترم بين الناس غير مستقبله وشغله اللى هيبقى فى مكان مرتاح وانه يتعب شويه ويرتاح بعد كده
انما لو فشلت مش هتلاقى شغل ومش هتلاقى بنت ناس محترمه توافق تتجوزك انما شهادتك اهم من المال ومن اى حاجه فى الدنيا
لو اتكلمت فى النصائح دى كتير اووووووى ولو احمد موجود فى المنتدى كان هيقولكم اد ايه بنصحه وبتمنى اشوفه احسن منى دائما

لا ابدا المدرسين كويسين ما دام الطلبه كويسين ومتفوقين ،،، ماده الرياضات واسم المدرس حسن هاشم ولا يمكن انساه وهو لا يمكن ينسانى
وكل ما اقابله يسلم عليا وبالاحضان وحببنى فيها جدا با اسلوبه الراقى فى الشرح

اكيد لو الاسئله هتختلف نفسى ارجع وكفايه انها مدرستك ياريهام

ممكن بكره انزل صوره شخصيه بس علشان ارفعها لسه