مجروح ومحتاج مساعده منكم بجد حياتى ادمرت ..... شوفوا حكايتى بلييييز

السلام عليكم ورحمه الله وبركاته

اسمى مجروح من اغلى حبيبه عندى واكتر واحده وثقت فيها وحبيتها بجد من قلبى

فى البدايه اتعرفت عليها من خلال الانترنت وحبتها اوى بدون ما اشوفها ولا اعرفها حبيتها من قلبى من اول رد فى مواضيعى

من بدايه دخولى النت بدور عليها لحد ما ربنا وفقنى واتعرفت عليها وحبيتها اوى لاحترامها وادبها اللى شوفته فى مواضيعها وردودها وكلامها

وبدون ما اشوفها كلمت والدها بعد ما طلبتها للزواج واخدت منها رقمه وكانت البدايه ونظرا لظروفى انى فى مقر عملى مقدرتش اروح الزياره الاولى

وكلمت اهلى وراحوا بيتها واتعرفوا عليها وعجبتهم وبلغونى وقلت بشرى خير وفرحت جدا انى خلاص هعيش مع انسانه فاهمانى وفاهمها وبحبها وبتحبنى بكل اخلاص

واخدت اجازه من شغلى ورحت زرتها اكتر من مره واخدت باقى اهلى واخواتى علشان يتعرفوا على حبيبتى اللى سبت الدنيا كلها واخترتها بس

وبعد مرور فتره من الوقت وقبل الخطوبه ما تتم حصلت مشاكل بين الاهل ولحد دلوقتى المشاكل متعلقه ومش عارف احلها خالص ورجعت شغلى تانى وانا فى عز المشاكل دى كلها

وبكلمها وبتكمنى واتعاهدنا اننا نكون لبعض ورغم كده اهلها بيضغطوا عليها تتجوز وتعيش حياتها وتستقر ومن كلامها بتقولى رافضه كل ده ورافضه ان اى

عريس يدخل بيتنا ورافضه تقابل حد وممتنعه خالص عن كلام اهلها ورغبتهم دى ورغم كل ده طلبت منها اكتر من مره انها تفرح وتفرح اهلها وتتجوز

ومشاكلنا قويه علينا ومش هنقدر نحلها ابدا ورغم كل ده قالت لا واتمسكت بيا ورغم انى بقول الكلام ده من ورا قلبى ومش ممكن اتخيلها فى حضن غيرى

او مع شخص غيرى لانى بغير عليها جدا حتى من اقرب الناس ليها وفجأه ومن كام يوم بس لقيتها بتكلمنى وبتقولى انها لبست واتزوقت وخرجت تقابل عريس

اتقدملها وقعدت معاه وكانت اول زياره له وقال انه هيتقدم مع اهله الزياره الجايه وكل ده وانا بموت وبتقطع ووالدها بيحاول يغصب عليها تتجوزه

وانه كابتن طيار ومن عائله اكيد وانا ولا اعرفه ولا اعرف عنه حاجه بس مجرد انها قابلته وقعدت معاه ده فى وجهه نظرى موافقه مبدئيه منها

وفتحت له الباب .... فين بقى كلامها مش هقابل حد ولا هكلم حد ولا هوافق على حد ولا هتجوز غيرك

انا منكرش انى نفسى افرحها واخليها تعيش سعيده بس هل ممكن يكون على حساب نفسى وقلبى وحبى ليها وجرح هيفضل ملازمنى العمر كله

حاسس انها خانتنى وخانت كل اللى بنا ومش عارف اعمل ايه

ابعد عنها وبلاش اسببلها مشاكل واعطلها جمبى ومش عارف هقدر اقنع الاهل من تانى رغم كل المشاكل اللى حصلت بينهم

ولا اتمسك بيها واجازف بكل غالى وثمين بس خايف اعطلها كتير ومقدرش اتجوزها فى الاخر وابقى دمرت انسانه بالنسبه ليا

اغلى عندى من حياتى ...... اعمل ايه بالله عليكم قولوا رائيكم مش عايز غير رائيكم لو انتم مكانى هتعملوا ايه

هل انا ظالمها فى حكمى انها خانتنى بمقابلتها للعريس اللى متقدم لها

ولا هيا كده خانت كل كلامها ووعودها ليا ومعايا

اعمل ايه ؟؟؟؟؟؟؟