باركولى من انهارده هكتب شعر الشباب تسقف با ايديها والبنات تزغرد ( واولى كتاباتى مجنون بحبك )

السلام عليكم ورحمه الله وبركاته

اخيرا قررت انى اكتب شعر وانافس الاديبه والشاعره حنين الليل

ومن النهارده هجبركم كلكم تلقبونى بشاعر واديب المنتدى


باختصار
انا مش شاعر
وياريت تعرفوا كده
انا بكتب للمتعه
بعيد عن التعقيدات
مره رومانسي
مره سياسي
ماليش لون
قلمي مليون لون في الكتابه
بحب اكتب ببساطه
بعفويه
ودا جزء صغير من عشقي
للبت اللي مدوخاني ومطلعه عيني مصر
اهدائي
لمصر
وكل اللي يحب مصر
ودمتم يارب بكل خير






باختصار
انا بعشقك
والعشق ما يعرف قرار
باختصار وعشقت نارك
ايوه نارك احلا نار
انتى شمسي
وانتي همسي
وانتي لمسي
وانتي ليلي والنهار
بعشقك
اه بعشقك
ميت ألف مره بعشقك
ومكست طباشيري وكتبت على الجدار
حبك فى قلبي اتولد
اصبح مدينه من العمار
بقى حب كامل
حب شامل
حب مبني على الفخار
هتصدقيني
لما اقولك انى بتنفس بعطرك
هتصدقيني لما اقولك
انى قدري هام فى قدرك
هتصدقيني لما اقولك
نفسي اكسر العذاب
لجل اوصل للسحاب
وهناك اجيب كام نجمه مهرك
هتصدقيني
شفت في عنيكي الحياه
ودعيت يخليكي الاله
وبكيت بقوه في الصلاه
علشان يامصر عشقت عطرك
الله عليكي طيبه
وجميله في عز الصبا
لما الغريب بيدق بابك
على طول تقولي مرحبا
يامصر يا ارض التاريخ متحني بيكي
يامصر يا رمز الصمود عاشق عنيكي
انا مهما اتعذب بحبك
ولو تعبت أحن ليكي
ضميني يابلادي وخلى الروح تروح
ضميني يابلادي وعشانك
الاراده تكون طموح
ضميني يابلادي وداوي
كل همي والجروح
انا مهما قلت يامصر
مسلوب الاراده
علشان يا غاليه العشق ليكي
منتهى كل العباده
مجنون انا بحبك
ودايب كل ما دا
وخلاص خلاص
عشقك هنا اصبح سعاده
عايز اصلي ركعتين
فى السيده وسيدنا الحسين
وكمان على نيلك اغني
موالين
موال محبه يكون كده عالى وملعلع
عايز اقولها يامصر عاشقك
بس نفسي الصوت يبدع
عايز اكون اسمر حليوه
ومصري مجدع
عايز اكون عبد الحليم
عبد الوهاب
وثومه والزمن الجميل
خليني تاني اقول ياعين وكان ياليل
مجنون جناني يامصر ليكي
شيئ شرف ليا ونبيل
مجنون بحبك بعشقك
والعشق ضد المستحيل
مجنون وعايز اجددك
نفسي اسعدك
وادا قلبي قدمتوا دليل
مجنون بمصر
وعشق مصر
الطيبه الحره الأبيه
يابلاد ابويا وامي والناس الغلابه
فى العشق يابلادي لقيتني
بدعت فى فنون الكتابه
وبقيت بحب اكتب كتير
وانسج مع شمسك يامصر خيوط حرير
واطلع لفوق وكمان لفوق
واجري واطير
الله على جناني في حبك
فجأه خلاني أمير
حاكم بعرش الكلمه والتعبير
فارس وقلمي بحبك انتي
عاش كبير
شوفي يا مصر
مهما هيحصل هعشقك
ولا قوه عني تفرقك
ولو جريتي من هوايا
هجري ويمكن اسبقك
خليني جنبك وسط قلبك دخليني
وارميني فى نيلك
ومن خيرك راعيني
يامصر مش لاقي انا في لغة الكلام
عن وصف عشقي والغرام
وهعيش هنا
وهموت هنا
وعشقت منك لو آلام
وخلاص بقى
مجنون أنا بحبك يامصر
وعليكي يامصر السلام
عليكي يابلادي السلام

بيست ويشز

واااااااااااااااااااااااااااااااااو أهلا بشاعر واديب المنتدى



نورت المنتدى بشعرك الذي يفوق الوصف والخيااااااااااااااااااااال



في انتظار ابداعاتك دائما ياباشا



احترامي وتقديري

والله ياريهام بتحرجينى بزوقك انتى اللى مشرفانى

ورافعه رأسى فى المنتدى وبتشعينى على طووول

وعلى رائ المثل : ريهام عجبها موضوعى ، ردت وقالت يااديب وشاعر المنتدى

نورتى الموضوع

بيست ويشز

الف مبروك ياشاعر المنتدى كلنا هنشجعك

وهنرفع راسك متخافش بس نشوف جديد مواضيعك على طول

ودى واحترامى