مكرونه بالبشاميل

من طرف **عين الحياه** الجمعة سبتمبر 16, 2011 4:13 am

صباح الخير وجمعه مباركه على الجميع ان شاء الله

النهارده هانعمل مع بعض مكرونه بالبشاميل بالتفصيل عشان خاطر عيون امنيات

وكل اللى عايزين يعرفوا طريقتها او يراجعوا الطريقه

نبدأ بسم الله ونقول المقادير

1-نص كيلو مكرونه اقلام او اى نوع تفضليه

2-نص كيلو لحمه مفرومه

3-بصله كبيره مفرومه

4-ملح وفلفل وزعتر وحبهان مطحون والتوابل اللى تحبيها

5-بيضه -مكعب مرق
6-جبنه مودزريلا مبشوره
مقادير البشاميل

4معالق سمنه وزيهم 4 معالق دقيق وممكن تستبدلى السمنه بزيت ذره

2 كوبايه كبيره لبن

طريقه البشاميل

هاتحطى السمنه مع الدقيق على النار لغايه ما ما الدقيق يبقى دهبى وتكونى حاطه اللبن وسخن على النار

تحطى اللبن ومكعب المرق وان كنت انا شخصيا بستعمل شوربه طبيعيه مع اللبن عشان البشاميل مايبقاش تقيل اوى من استعمال اللبن لوحده

وتقلبى بسرعه بالمضرب السلك عشان مش يكلكع منك وتحطيله ملح وفلفل

نيجى نعصج اللحمه

ضيفى البصل مع اللحمه مع معلقه زيت على نار هاديه وتبليها وسيبها لغايه ما تستوى

اسلقى المكرونه لمده 7 دقايق على النار

دلوقتى المقادير بتاعتنا كلها جاهزة على الخلط فى الصنينه بتاعتى

هاتجيبى صينيه وادهنيها بالبقسماط

واخلطى نص مقدار المكرونه مع نص مقدار البشاميل وحطى الخليط فى الصنيه

وبعدين حطى اللحمه ووزعيها كويس

بعدين النص التانى من المكرونه

والنص التانى للبشاميل اتضيفى عليه بيضه لو مش هاتحطى جبنه على الوش

لو حابه تحطى جبنه يبقى ما تحطيش البيضه

تحطى باقى البشاميل على وش الصنيه وتوزعيه كويس جدا

وتحطى الجبنه المبشوره على الوش

وتدخليها فى فرن متوسط الحراره لغايه ما تبقى بالشكل ده

مكرونه بالبشاميل Post-5209-0-98435300-1306542661