دروس الرخامه (الدرس الثالث ) ازاي ترخم في محل عصير قصب

هنكمل فن الرخامه العالي على على اى حد من مخاليق ربنا ...


المره اللى فاتت لما انت رخمت على بتاع الكشرى..
اكيد روحت من غير عينك الشمال ..
بس ..
ليه تضيع فرصة انك ترخم على حد حتى لو ممعكش الا جنيه..
يبقى حلو اوى.. نطلع عين مين.. ترخم علي مين..وتبص يمين وشمال بعد ما تخرج من محل الكشرى وهوب..تلاقى محل مرطبات وعصير..

اهلاً بيكو فى الجزء الثالث من السلسله...



تخش بمنتهى الشياكه وتقولو عايز كباية عصير..
الضحيه على طول هيصبلك واحد قصب..
بعد ما يديهولك..قوله هو انا قلتلك انا عايز قصب..؟؟ هيقولك اسف جيب الكوبايه.. عايز ايه؟؟..قوله خلاص خلاص.. مش هتعبك هشربها..
بص فى الكبايه بتمعن شديد.. وكشر حواجبك.. وعلى صوتك وانت بتقول..ايه ده يا حاج؟؟.. الكبايه دى فيها تراب ووساخه..
هيبص ف الكبايه ويقولك لاء.. ده القصب بيكون كده لما بيتعصر ..انت اول مره تشربو ولا ايه؟؟
قله لا خلاص.. اصلى عندى حصوه ومش ناقصه تراب..
هيقولك دا القصب ده اصلا موجود عشان الحصاوى..
قله خلاص بلاش بجد...
ادينى تمر هندى..

وهو بيصب التمر وف نص الكبايه المصبوبه قله..
الله..دنتا عندك سوبيا..
خلاص خليها سوبيا والنبى عشان نفسى فيها من زمان وهموت عليها..
هيرجع نص الكبايه فى الدورق ويشتمك فى سره..
ويصبلك السوبيا ويحطهالك ع الرخامه من غير ميبص فى وشك ..
وماله يا خويا .. لسه الـ الرخامه مخلصتش..

قوله بصوت عالى وخلى اللى حواليك يسمع..عايز شاليموه عشان عندى دمل فى بقى من جوه ومش عايز اعدى اللى هيشرب بعديه..

هيتقرف منك ويرميلك شاليموه ع الرخامه..

خدها واشرب بيها وقوله بعد اول شفطه..
البتاع ده دلع ليه؟
ميه ونشا بجنيه.. ده حتى يبقى حرام..
هيقولك معلش التلج بس هو اللى مدلعه..
قوله.. لا دا ماسخ اوى.. مش هقدر اكمله..المحل ده تعبان كده ليه مش عارف..

وسيب تلت تربع الكوبايه مليانه..
ولما تيجى تحطها ع الرخامه.. حطها ع الحرف.. واعمل انها وقعت غصب عنك..
طبعاً هتنزل حتت..
وهترفع ضغط اللى جابو الراجل بتاع العصير وهو بيعطل الزباين ويلف يمسح العصير والقزاز اللى ملى ارض المحل...
بمنتهى الشياكه قوله.. سورى والله.. حساب الكوبايه القزاز كام؟؟..
هيقولك امشى يلا يبن التيييييييت احسنلك..

..
الناس دى مش محترمه ليه..
منته بتعرض انك تدفع حق الكوبايه اللى اتكسرت..

ايه اللى غلطت فيه بقى..

يلا .... حط الفلوس ف جيبك ونفض للاحراج وسيبو بالقزاز..
وفكر..
نعمل ايه تانى قبل ما نروح...

( الموضوع هزار بس لو عجبك اعملو واستحمل )
يتبع...

رخامه على حق ربنا يامعلم

واضح انك مجرب ههههههههههههههه

احترامى وتقديرى

ومنتظرين باقى الكورس